"AzerTelecom"un baş icraçı direktoru ADA Universitetində tələbələrlə görüşüb

"AzerTelecom" şirkətinin baş icraçı direktoru Ana Nakaşidze ADA Universitetinin "Senior Talks" layihəsinə qatılaraq tələbələr ilə görüş keçirib. O, şəxsi liderlik yolu və peşəkar idarəçi keyfiyyətlərini formalaşdıran təcrübə haqqında bəhs edib. Ana Nakaşidze, həmçinin telekommunikasiya sahəsində ona dayanıqlıq qazandıran çağırışlar barədə tələbələrə məlumat verib və daima öyrənməyin vacibliyini vurğulayıb.

Çıxışı zamanı Ana Nakaşidze qlobal bağlantıda yeniliklərə də toxunub, həmçinin Rəqəmsal İpək Yolu təşəbbüsünün və Transxəzər Fiber-Optik Kabel Xətti layihəsinin regionların birləşməsində və daha güclü rəqəmsal bağlantının qurulmasında strateji roluna diqqət çəkib.

Tələbələrlə səmimi ünsiyyət tədbirə xüsusi ab-hava qatıb. Liderlik təcrübələri, texnologiya və telekommunikasiyada gələcək trendlər barədə müxtəlif suallar və müzakirə bu görüşü hər kəs üçün maraqlı edib.